#CulturaVivaBCO – Una Campanha de Partatge Cultural

Una campanha de partatge cultural organizada pel Centre Inter-regional de desvolopament de l’occitan (CIRDÒC)

A l’escasença del segond Forum euroregional « Culturas Popularas en dialòg », lo CIRDÒC, granda bibliotèca de la lenga e de la cultura occitanas, e sos partenaris organizan una mobilizacion collectiva sus las rets socialas per tal de metre en relacion e promòure la riquesa de las culturas popularas de l’espaci occitano-catalan que va del Piemont Italian al país Valencian.

A la clau, venètz ambaissador de vòstra cultura e integratz la ret dels actors del patrimòni cultural immaterial.

Fasètz conéisser vòstras accions e iniciativas e recebètz vòstre kit ambaissador

Los participants a la mesa en òbra d’aqueste repertòri recebràn un kit “Ambaissador / Ambaissadora de cultura” que lor permetrà gràcias a de libres, CD, DVD e fòrças causas mai de descubrir tota la riquesa culturala d’aqueste territòri.

Cossí participar ?

  • Redigir un pichòt tèxte de presentacion de son organizacion e de sas accions per las culturas popularas e pel patrimòni viu de son territòri acompanhat d’una fòto o vidèo ;
  • Mandatz-lo a culturavivabco@cirdoc.fr o postatz-lo dirèctament sus vòstra pagina o compte Facebook amb lo tag @CulturaVivaBCO ;
  • Reperatz e escambiatz amb los ambaissadors e ambaissadoras de CulturaViva de las Balearas, Catalonha, Occitània sus www.tumblr.com/blog/culturavivabco e los 18 e 19 de mai venent al Forum euroregional « Culturas popularas en dialòg » al Pont de Gard.

Al còr de l’Arc Nòrd-Mediterranèu, l’espaci occitano-catalan : un extraordinari territòri de diversitat culturala.

L’espaci occitano-catalan que va del Piemont Italian al País Valencian constituís lo còr de l’Arc Nòrd-Mediterranèu. Aqueste espaci es particularament ric de sas culturas vivantas tradicionalas. Aquestas son constituidas per de fèstas e rites collectius, saber-faire agricòla e artesanals, un patrimòni gastronomic e agroalimentari, de jòcs e espòrts tradicionals e d’un legendari popular fòrça present. Aquestas manifestacions a l’encòp ancestralas e contemporanèas constituisson los emblèmas d’aqueste territòri e mobilizan las populacions, contribuïssent aital a son originalitat e son atractivitat. Dins aquela dinamica lo CIRDÒC vos convida a venir ambaissador de las praticas vivantas de vòstre territòri e a participar al dialòg de las lengas e culturas entre Baleares, Catalonha e Occitània.

Forum Euroregional « Culturas popularas en dialòg »

Aprèp un primièr Forum en 2016, lo CIRDÒC, la Fira Mediterrània de Manresa e Sa Xerxa – Fira de Teatre Infantil i Juvenil (FIET) organizan una novèla edicion dedicada a la question clau del patrimòni cultural immaterial. Aqueste forum a per objectiu de sosténer lo dialòg entre los pòbles de l’Arc Nòrd-Mediterranèu, la mobilitat artistica, aital coma de favorizar lo raionament de las expressions culturalas del territòri. Es doncas los 18 e 19 de mai que se debanaràn doas jornadas de rescontre, de conferéncias e de fèsta a l’entorn de las culturas popularas d’Occitània, de Catalonha e de las Islas Balearas.

Ne saber + : aquí

TwitterFacebookGoogle+LinkedInPinterestTumblrEmail